ISTAMBAY SA MINDANAO

Dako ang akong garbo nga matagbuan saWikipedia ang pangalan sa usa ka manunulat sa pinolungang Binisaya nga si Reine Artianza Cabrera.

Para nako, usa ka tanyag ug maayo nga manunulat si Reine. Sa wala ko pa siya nahimamat, usa siya sa mga staff sa editorial team sa Bisaya magasin didto sa Manila. Nakauban nako siya sa trabaho didto sa dakbayan sa Malaybalay niadtong mga tuig 2001-2004. Pareho ming empleyado sa mantalaang lokal sa Bukidnon, ang Central Mindanao Newswatch. Kami lang duha editor niadtong tungura, ako sa English ug siya usab sa Binisaya.

Simpling tao si Ate Reine, mapamainubsanon og dunay mga prinsipyo sa panginabuhi. Tingali nagpadugang pa gyud sa iyang pagkaisug sa panginabuhi ang iyahang pagka single parent sa tulo niya ka mga anak. Dugang pa niini, kugihan usab siya nga pagkatawo.

Daghang higayon nga nahagit siya sa mga pagsulay sa kinabuhi og sa katapusan nakit-an nako ang iyahang pagkamadinaugon.

Usa si Ate Reine sa mga pipila lang ka mga manunulat of fiction sa Bukidnon nga aduna unta’y abilidad apan wala lang gayud mataga-i og insaktong higayon aron mosidlak sa ilang pagsuwat. Hinuon, sa iyahang kaugalingong paagi og sa iyang hinay-hinay nga pagtahas, dili usab mapagkang ang iyahang mga naabot isip usa ka manunulat. Basaha kini alang sa dugang kasayuran sa usa sa mga halandong gasa sa Bukidnon sa natad sa pagsulat Binisaya.